|
"Liabe
Grohwiesenga Trachtla, z'erst moi griaß God,
es is' a froher Anlaß, der uns heit herg'führt hod.
Wiss es eh scho wißt's, lod ma heia im Summa alle ein
zum achtzigsten Geburtstagsfest von unsam Trachtenverein.
Zum Patenbitten wad ma heit do,
wo ma her san – des wisst's es scho.
30 Joahr is aiz scho her – mir wern mas net vogessn
das ma da herunt bei enk san gsessn.
San lustig gwen hama gessn und drunga,
und ois Patenverein stoiz unsa Fahna gschwunga.
Und war bei uns vo Zeit zu Zeit a Festlichkeit vorhand'n,
do hod's vo enk koa Na ned geb'n, seid's uns zur Seit'n
g'stand'n.
Des ehrt eich und D'Riedlstoana wiss'n des woi zu schätz'n
a guade Freindschaft is hoid amoi, durch gar nix zu ersetz'n.
Jetz is der Zeitpunkt wieda do, a Fest'l zu bestreit'n
und mia, mia dean mit Fleiß uns scho, ganz fest d'rauf
vorbereit'n.
An Schirmherr'n dazu ham ma uns find'n woin,
do is de Wahl , ihr glaubt's es kam, auf unsa'n Möbelboss
g'foin.
Da Vogl Kurt hod se ned lang bitt'n laß'n:
"Ois Schirmherr kenn i meine Pflicht, wui mi damit befass'n.
I mach des gern," so hod er g'sogt "und unterstütz eich
g'wiß."
Do is uns dann scho leichta g'wen, wos ganz verständlich is.
Beim Festbraut suacha, ham mia uns an Kopf zbrocha a boar
stund´n
Doch mit Erfolg: am End ham ma, a ganz a fesche g'fund'n.
D'Lisa Aschenbrenner hod unsa Fleh'n erhört
und für dieses hohe Amt sich mit groaßa freid bereit
erklärt.
So steh ma oiso do vor eich und bitt'n hoid recht sche:
"Wollt's ned a heia wiederum ois Ehrenpat'n mit uns geh?
A riesengrouße Freid war des und dad uns wirklich ehr'n,
wenn's gebats eian Herz an Stouß und dad's de Bitt' erhör'n.
A bissl a Buaß des seng ma ja ei,
a wengl uns trazn' des deaf scho sei.
Drum oiso überlegt's ned lang, sogt's ja und schlagt's ei
ganz fest,
dann feiern mia mitnanda boid, a schens 80 jährig's
Jubelfest.
Und wenns dann zuasogts, dann song mas enk glei,
a Fassl voi Bier des hama dabei
und a schene Brotzeit vui gnua,
denn ebs guats zum Essn, g'hört zum feiern dazu. |
